असांजी नेकीअ ते / श्रीकान्त 'सदफ़'
असांजी नेकीअ ते
शकु न आणिजो, ॿेली!
असीं ॾाढा नेक इनसान आहियूं
हसद, बग़ज़, वेर विरोध खां
अणॻणित मेलनि जे मुफ़ासिले ते
असां जी पंहिंजी जुदा हिक बस्ती आहे
असां खे खबर आहे
तव्हां जी ताज़ा तरीन शिकायत कहिड़ी आहे
ॿेली, ही जेके असांजा ॾीआ आहिनि
इन्हनि ॾीअनि में जेका रोशनी आहे
इन रोशनीअ जी जेका अज़मत आहे
इन अज़मत खे जताइण लाइ
असां लाइ लाज़िमी बणिजी पियो हो
त नक़ली सॾियूं, मसनवी सॾियूं
उन रोशनीअ खे
जेका कंहिं ॿीअ बस्तीअ मां
अची रही आहे।
असां जे नेकीअ ते शकु न आणिजो, ॿेली
असीं ॾाढा नेक इनसान आहियूं
ॾींहं जे रोशनीअ में
असां खां कॾहिं बि को सुवालु न कजो
असां जा लफ़्ज़ भुरी पवन्दा आहिनि
ऐं जवाबनि खे जोड़े न सघन्दा आहियूं
असां जे नेकीअ ते शकु न आणिजो, ॿेली
असीं ॾाढा नेक इनसान आहियूं।
इहा ॿी ॻाल्हि
त रात जी ऊंदहि में
असांजी नेकी
असां खे भूंडा ॾीन्दी आहे
ऐं असीं शरारती छोकिरनि जियां
फ़क़ति मुस्कुराईन्दा आहियूं
तव्हीं असां ते शकु आणियो त भली आणियो
पर
असां जे नेकीअ ते शकु न आणिजो, ॿेली
असीं ॾाढा नेक इनसान आहियूं!!
