जॾहिं उहो ॾींहुं ईन्दो आहे
सिपाही पंहिंजी माउ जा पेर छुहन्दो आहे
पंहिंजी ज़ाल ॾांहुं सिक सां निहारीन्दो आहे
पंहिंजे ॿार जी पेशानी चुमन्दो आहे।
जॾहिं उहो ॾींहुं ईन्दो आहे
सिपाही मौत जो सामानु
पाण सां खणन्दो आहे
बम ऐं मिसाईल
पंहिंजी ॻिचीअ में ॿधन्दो आहे
पाण खे सख़्त दिल ॾेखारण जी
कोशिश कन्दो आहे...
जॾहिं उहो ॾींहुं ईन्दो आहे
सिपाही लड़ाईअ जे मैदान ते
पहुचन्दो आहे
पंहिंजे वतन खे बचाइण लाइ
ॿिए वतन जे सिपाहीअ सां
विढ़न्दो आहे...
जॾहिं उहो ॾींहुं ईन्दो आहे
ॾींहुं गुज़रन्दो आहे, रात गुज़रन्दी आहे
धरती ॻाढ़ी हून्दी आहे
आसमानु ॻाढ़ो हून्दो आहे
ऐं
ॻाढ़े रंग खां सिवाइ
कुझु कोन बचन्दो आहे...!
जॾहिं उहो ॾींहुं ईन्दो आहे
सिपाही अखियूं बूटे
मुश्कन्दो आहे
हू दुनिया में शान्ती आणण लाइ
जीअन्दो आहे
हू दुनिया में शान्ती आणण लाइ
जंगि कन्दो आहे
हू दुनिया में शान्ती आणण लाइ
मरन्दो आहे
ऐं आखि़र में
शान्तीअ जी दुनिया में
हलियो वेन्दो आहे
जॾहिं उहो ॾींहुं ईन्दो आहे।