मोदीअ जो बिल / अर्जुन ‘शाद’
1.
मूंखे खपे हयात में मस्ती शराब जी
झंकार अकुल व होश खसींदड़ रबाब जी
बेखुद रहां, रहे न मूंखे पंहिंजी जिअं ख़बर
दुनिया खपे जिते न हुजे पहुच ख़वाब जी
का मौज अहिड़ी बज़्म ॾे दिल खे जॾहिं धिके
दामन थो तंहिं समे अची मोदीअ जो बिल छिके!
2.
बादल जां रेल छेल मां आकास में घुमां
मंज़िल न माॻ कोई मूंखे, मां पियो रुलां
तारा चवनि, वराए चवनि: आउ, आउ, आउ!!!
आनन्द में अची मां स्विंवणि जां पियो हसां
पर्दे में बादलनि जे वञी दिल जॾहिं लिके
दामन थो तंहिं समे अची मोदीअ जो बिल छिके!
3.
माणियां सरूर चन्ड जे रमणीक रूप मां
सागर में दिल जा भाव पियो उथलन्दा ॾिसां
आगोश मखमलीअ में सुम्ही माहताब जे
स्वहुराणि ज़िन्दगीअ जी समूरी भुली वञा
जिअं हुस्न चन्ड जे ते वञे थी नज़र टिकी
दामन थो तंहिं समे अची मोदीअ जो बिल छिके!
4.
मय में टुॿियूं ॾियां थो, चढ़े पर नथो ख़ुमार
अफसोस हाल पंहिंजे ते खावां थो बार बार
कहिड़ो जीअणु थियो रूहु जिते बंद कै़द में
आयो कॾहिं पखीअ खे उॾामण बिना क़रार?
नगमनि ते नग़मा दिल जॾी ॻाइण जे लइ सिके
दामन थो तंहिं समे अची मोदीअ जो बिल छिके!
