हवा में शराब / अर्जुन ‘शाद’
हवा में कंहिं त मिलाए छॾियो शराब आहे!
सभिनि ते कंहिं जी थी यकसां अॼु इनायत आ
ग़रीब तोड़े ग़नी-अॼु इन्हनि जे अखिड़ियुनि में
नशो समायो आ जंहिं जो न को हिसाब आहे
हवा में कंहिं त मिलाए छॾियो शराब आहे!!
सुतलु हो रूहु इएं ॼणुकि रूहु हो ई कोन
वजूद इन जो अचे थो सॼीअ फ़ज़ा में नज़र
भला ही कहिड़ी हसीन नाज़नीं जो आंचलु हो
छुहाअ जंहिं जे खां ॼणु ज़री ज़री रूह अंदर
उथियो छा जोश - मुहबत जो इजि़्तराब आहे
हवा में कंहिं त मिलाए छॾियो शराब आहे!
बहार मुरिकंदी आई... ज़रा नज़र त बराइ
दिलियुनि में ज़िन्दगी आई... ज़रा नजर त बराइ
हयात ख़ुश्क में मचिली उथियो शबाब आहे
हवा में कंहिं त मिलाए छॾियो शराब आहे!
कलियुनि में जोश जवानीअ जे अॼु उछल खाधी
हसीन चेहरा खणी फूल मुरिकंदा निकता
मिठियुनि ॾियण जे लइ बुलबुल थी बेक़रार घणी
पखियुनि जी लाति नईं, प्रेम जी पुकार नईं
अनार जोश - मसर्रत खां ॼणुकि फाटे थो
जवान आडू़ चबे थो त को छिने मूंखे
ज़मीन पंहिंजे जवानी छुपाए कीन सघी
नदीअ जे सीने जी जज़्बात बेनक़ाब आहे
हवा में कंहिं त मिलाए छॾियो शराब आहे!
बशर बशर ने ॼमायो आ पंहिंजो रंग बहार
ख़मोश प्यार में आंदो नओं उमंगु बहार
सभिनि जो छेड़े छॾियो आहि अंग अंग बहार
हज़ार शु/क जो अॼु ऋतु बसंत जी आई
दिलियुनि में प्यार जी जंहिं चिणिग आहि भड़काई
कयो आ मुंहिंजे लइ छा छा न ‘शाद’ मौसम अॼु
भुलाबो अर्से खां पोइ दिलरुबा हिजाब आहे
हवा में कंहिं त मिलाए छॾियो शराब आहे!
