भारत की संस्कृति के लिए... भाषा की उन्नति के लिए... साहित्य के प्रसार के लिए
सभ्भे अंग्रेजी हिन्दी नांय / धीरज पंडित
Kavita Kosh से
Lalit Kumar (चर्चा | योगदान) द्वारा परिवर्तित 16:09, 29 मार्च 2017 का अवतरण ('{{KKGlobal}} {{KKRachna |रचनाकार=धीरज पंडित |अनुवादक= |संग्रह=अंग प...' के साथ नया पृष्ठ बनाया)
बीतलै जखनी आधो रात
एक दोसरा सेॅ करलकै बात
भोरे उठी केॅ हम्मेॅ देखलियै
एक्को आदमी गामो मेॅ नांय
हमरा लगलै सभ्भे अंग्रेजी हिन्दी नांय!
होकरें पेॅहलोॅ सुनै मेॅ अइलै
लोगोॅ खुब तैयारी करेॅलकै
गलै नैका साल मनाय लेॅ
घरोॅ के जोगऽ होकरोॅ माय
हमरा लगलै सभ्भे अंग्रेजी हिन्दी नांय!
मुर्गा आरू खीर बनैलकै
कोय पहाड़ी पेॅ कोय कचनार गेलै
रातो केॅ जबोॅ लौटी केॅ अइलै
तेॅ घरोॅ मेॅ देखै छौनी नांय
हमरा लगलै सभ्भे अंग्रेजी हिन्दी नांय!
जनवरी-फरवरी केॅ सभ्भे मानै छै
चैतोॅ बैशाखोॅ कॅे कि कहबोॅ
दोसरा देखी केॅ उछलै छोॅ
अपना देखी केॅ बनै छो कांय
हमरा लगलै सभ्भे अंग्रेजी हिन्दी नांय!
तारीख बदलै कि दुनिया बदली गेलै
खुशी सेॅ सबरोॅ ”धीरज“ भागी गेलै
जहाँ दोसरा के जनाना के साथो मेॅ
घुमै फिरै छै दोसरा के सांय
हमरा लगलै सभ्भे अंग्रेजी हिन्दी नांय!
