भारत की संस्कृति के लिए... भाषा की उन्नति के लिए... साहित्य के प्रसार के लिए
टेसू रं गाल लाल / राजकुमार
Kavita Kosh से
Lalit Kumar (चर्चा | योगदान) द्वारा परिवर्तित 17:50, 5 अप्रैल 2017 का अवतरण ('{{KKGlobal}} {{KKRachna |रचनाकार=राजकुमार |अनुवादक= |संग्रह=टेसू क...' के साथ नया पृष्ठ बनाया)
टेसू रं गाल लाल हरियर छै सारी
सावन रोॅ सेजिया पर अल्पना कुमारी
पछिया के महा नें अँचरा झकझोरै छै
आगि जे पझैलोॅ छै कलेॅ-कलेॅ खोरै छै
नीपै छै गोरिया के ऐंगना-देहारी
टेसू रं गाल लाल हरियर छै सारी
लागलोॅ झपासी में पुरबा झकासै छै
पोखरी में पुरइन रोॅ पात-पात भाँसै छै
नाचै छै मधुमाछी भँवरा जुआरी
टेसू रं गाल लाल हरियर छै सारी
मुखड़ा गुजरिया रोॅ दर्पण दरकाबै छै
चिमनी चटकाबै छै अंजन बरकाबै छै
चन्दन पर नागिन के खुललोॅ पेटारी
टेसू रं गाल लाल हरियर छै सारी
‘राज’ रात करकुट्ठोंॅ टिमिर-टिमिर बाती छै
सुगिया के लोलोॅ में असरा के पाती छै
कजरी के नजरी में कजरा मुरारी
टेसू रं गाल लाल हरियर छै सारी
