भारत की संस्कृति के लिए... भाषा की उन्नति के लिए... साहित्य के प्रसार के लिए
घोघ्घो तर मुसकै / राजकुमार
Kavita Kosh से
Lalit Kumar (चर्चा | योगदान) द्वारा परिवर्तित 17:50, 5 अप्रैल 2017 का अवतरण ('{{KKGlobal}} {{KKRachna |रचनाकार=राजकुमार |अनुवादक= |संग्रह=टेसू क...' के साथ नया पृष्ठ बनाया)
घोघ्घो तर मुसकै सजनियाँ
रिमझिम-रिमझिम बरसै पनियाँ
रुनझुन बाजै छै पैजनियाँ
लोरबा ढारी-ढारी केॅ
सजनी सजना लेली मछरी
दीयर बारी-बारी केॅ
बदरी-बदरी छै पनियैलोॅ
पानी-पानी घैलोॅ-घैलोॅ
पनघट-पनघट दरद समैलोॅ
दुखबा गारी-गारी केॅ
सजनी सजना लेली...
मेहा देखी मोॅन मयूरा
रहि-रहि फसकै कसलोॅ जूड़ा
चढ़लोॅ लहर-लहर कंगूरा
लहरा लारी-लारी केॅ
सजनी सजना लेली...
आँखी में बरसात सजैली
कन-कन खिललोॅ कनक-कनैली
तपलोॅ सितुआ रं सपनैली
सपना डारी-डारी कॅे
सजनी सजना लेली...
तलफल जइसे नद्दी-झरना
पानी मँ भी भेली अपरना
एक्के सुजनी एक्के ओढ़ना
मनमाँ मारी-मारी केॅ
सजनी सजना लेली...
