रात होलोॅ लम्बा छै, दिन छै होलोॅ छोटोॅ
जिनगी के सड़िया में, असरा रोॅ गोटोॅ
आँखी तर झामर छै, असमानो सामर छै
धूरा-धूरा उठलोॅ, बिमछैलोॅ बामर छै
देहरी रोॅ दीया, अब चढ़लै परकोटोॅ
जिनगी के सड़िया में, असरा रोॅ गोटोॅ
औंगरी पर गुनी-गुनी, रुइया केॅ तूनै छी
सोचोॅ के सीयै ली, सुइया के चूनै छी
हँसतै धरती हमरोॅ, नै रहतै खोंटोॅ
जिनगी के सड़िया में, असरा रोॅ गोटोॅ
टूटलोॅ देबाली सें, आर-पार झाँकै छी
किरणोॅ के बीया ले, सुरुजोॅ के ताकै छी
बिछलोॅ छी बीछै ली, खेतोॅ से टोटोॅ
जिनगी के सड़िया में, असरा रोॅ गोटोॅ
काटै छी रात कठिन, पाबै छी घातोॅ के
जगले छी ढिबरी रं, लाबै ली प्रातोॅ के
नै दबतै रसरी सें, बछिया के ठोठोॅ
जिनगी के सड़िया में, असरा रोॅ गोटोॅ