भारत की संस्कृति के लिए... भाषा की उन्नति के लिए... साहित्य के प्रसार के लिए
टीनही बाटीमे / अविरल-अविराम / नारायण झा
Kavita Kosh से
Sharda suman (चर्चा | योगदान) द्वारा परिवर्तित 19:33, 29 अगस्त 2017 का अवतरण ('{{KKGlobal}} {{KKRachna |रचनाकार=नारायण झा |अनुवादक= |संग्रह=अविरल-...' के साथ नया पृष्ठ बनाया)
आइ काल्हि
धनक ग्राफ
चढ़ि चुकलैए शीर्ष पर
हमरा
बुझैए लोक भीखमंगा
बुझैए लोक बताह
बुझैए लोक अपंग
बुझैए सभ हमरा बेकाजक
तेँ हमर टीनही बाटीमे
टनटना दैत अछि सिक्का
केयो-केयो नोटो
झहरैत रहैए दिन-राति
हमरा लेल लक्ष्मी
तृप्त करैए लोक
अपन-अपन आत्माकेँ
ओ लोक जोड़बैए नाम
दानवीरक सूचीमे
ओ लोक बनैए
धर्मक गबाह
शिलापट्टमे खोदबैए नाम
दयाक प्रतिमूर्ति सूचीमे
हम दिन-राति
लगौने रहै छी एकटक्क
के पझाओत पेटक आगि
नहि होइए फाँकल
सिक्का आ नोट
नहि सिझायल होइए
मुद्रा सँ दू कओर अन्न
नहि जानि ओ लोकनि
केना फँकैत छथि
हम नहि फाँकि पबै छी
आइ काल्हि
धनक ग्राफ
चढ़ि चुकलैए शीर्ष पर।
