कसले बजायो —
मान्छेको बस्तीमा एकोहोरो दुःखको बाँसुरी
मैले पनि
थुप्रै सपनाहरु लिएर तिमीसँगै दाँजिदै
क्षितिज नियालेकी थिएँ घामको यात्रामा
समयको बैँसलाई
कुमारी आमा बनाउँदा
देश छिया–छिया छ/ बस्ती उदास–उदास छ ।
कसले बनायो रगतको समुद्र
अचेल —
निरस छ समुद्रका सुसाइहरु
मैले पनि त्यस दिन आकाश नियाल्दै
तिमीसँगै समुद्रको फैलावट
नियालेकी थिएँ यात्रामा
आदिज्ञान प्राप्त स्थानबाट
हृदयको कलिलो जन्महरुलाई
म — फेरि मृत्यु बाँड्न चाहन्न
म,
राजमार्गमा उभिएर प्रेमप्रदेश नियालिरहेछु ।
मान्छे —
सपनामै भए पनि प्रेमको भोको हुन्छ
मान्छे —
सपनामै भए पनि शान्तिको कामना गर्छ
ओ जिजस !
ओ रावण !
ओ बुद्ध !
आऊ चिर र हेर मान्छेका मुटुहरु
आऊ चुम र बुझ आँखाका भाषाहरु
त्यहाँ पाउने छौ तिमीले
अभिमानको विरूद्धमा सामिप्यका जुलुसहरु
बन्दुकको विरूद्धमा राष्ट्रियताका प्रेमहरु
कसले बजायो ?
मान्छेको बस्तीमा जीवन विरूद्धका सङ्गीतहरु ।