भारत की संस्कृति के लिए... भाषा की उन्नति के लिए... साहित्य के प्रसार के लिए
सावन सूतल भागल भादो / कमला प्रसाद मिश्र 'विप्र'
Kavita Kosh से
Sharda suman (चर्चा | योगदान) द्वारा परिवर्तित 14:09, 17 फ़रवरी 2018 का अवतरण (Sharda suman ने सावन सूतल भागल भादो / कमला प्रसाद मिश्र ‘विप्र’ पृष्ठ [[सावन सूतल भागल भादो / कमला प्रसाद...)
सावन सूतल भागल भादो
शरद शुभ आइल हे!
बुलुकि-बुलुकि रोइ के बदरा चुपाइल,
नदी-ताल-तलइयन के ओठा झुराइल।
झँखत झिंगुरवा कोना अँतरा लुकाइल,
कास बुढ़ाइल हे, घरद शुभ आइल हे!
उगल अगस्त आ आकाश अगराइल,
उतरलि खँड़लिच, मोरवा लुकाइल।
चिहुकि चकइया चितवे, चकवा चिहाइल,
चान मुसकाइल हे, शरद शुभ आइल हे।
राह आ घाट छेंकल, छोड़लस पानी,
लेति बा हिलोर जल में पुरइनि रानी।
अंग-अंग मातल रस में झुमति बा जवानी,
कमल फुलाइल हे, शरद शुभ आइल हे।
खटे में ना खेतिहर कइले बाड़े खोटी,
धानवाँ पहिरि झुमे धानी रंग धोती
घसियन का पतइन पर झुले लागल मोती,
सरग सिहाइल हे, शरद शुभ आइल हे।
