नयकी जोजना में गदहा सब / जयराम दरवेशपुरी
अब की योजना में गदहा सब इंगलैंड जइतो रिसर्च करइले
अब गदहा सब के पढ़वइले सरकार लगल हो खर्च करइले
बुढ़वा-बुढ़िया के पढ़बइ ले खुललो गाँव में रात्रि पाठशाला
असली पढ़बइया के मुँह पर ठोका गेलो गोदरेज के ताला
अनौपचारिक शिक्षा के दउड़इ चमचम हुर-हुर डिस्को गाड़ी
कउन तकनीक से भरतो तोहर इसकुल बंगाल वला सन खाड़ी
अकिल सिखइतो अंइटा ढोवे ओह पर लगतो खर्च करइले
सात समुद्र में लिफ्ट लगइतो अउ असमान में सीढ़ी
पइसा न´ तऽ पइदल जइबा दुलकल अगला पीढ़ी
सूरज चान तरेगन जइतो नया गीत के तर्ज गढ़इ ले
हिम शिखर पर बड़का टंकी महासमुद्र में पैप समइतो
सिंचाई के नया जोजना खेते खेत पानी बरसइता
बारहो मास हरियाली रहतो जइतो विदेशी कर्ज भरइले
कमप्यूटर से दूध बरसतो अउ रडार से घी के लोंदा
नेता लीड़र मंत्री सब के तेवर होतइ भारी तोंदा
खेत जोतइतो अब जहाज से टेंक सड़किया पस्त करइले
