भारत की संस्कृति के लिए... भाषा की उन्नति के लिए... साहित्य के प्रसार के लिए
कजली / 53 / प्रेमघन
Kavita Kosh से
झूले की कजली
बृजभाषा भूषित
झूलन की उझकनि झुकि झूलनि॥
कलित निकुंज कदम्ब कलापी
कुल कूकनि कालिन्दी कूलनि॥
ललित लतन लपटनि तरु उपबन
फबे फैलि फूले फल फूलनि॥
गावनि गरबीली गजगामिनि
गन गोपाल हरखि हँसि हूलनि॥
लहँगन की लहरानि पितम्बर,
की फहरानि हरनि हिय सूलनि॥
झुमकन की झूलनि जैसी,
त्यों झुलनी की झूलनि सुख मूलनि॥
उरझनि बन माली बन माला,
बाल माल माती सँग चूलनि॥
प्रेम प्रलाप करत देउ मोहे,
कहि कहिनिज बतियन की भूलनि॥
बरसत रस मिलि जुगल प्रेमघन,
लगि हिय लहि आनन्द अतूलनि॥98॥
