भारत की संस्कृति के लिए... भाषा की उन्नति के लिए... साहित्य के प्रसार के लिए
गीतावली सुन्दरकाण्ड पद 41 से 51 तक/पृष्ठ 4
Kavita Kosh से
(44)
दीन-हित बिरद पुराननि गायो |
आरत-बन्धु, कृपालु, मृदुल-चित जानि सरन हौं आयो ||
तुम्हरे रिपुको अनुज बिभीषन, बंस निसाचर जायो |
सुनि गुन-सील-सुभाउ नाथको मैं चरननि चितु लायो ||
जानत प्रभु दुख-सुख दासनिको, तातें कहि न सुनायो |
करु करुना भरि नयन बिलोकहु, तब जानौं अपनायो ||
बचन बिनीत सुनत रघुनायक हँसि करि निकट बुलायो |
भेण्ट्यो हरि भरि अंक भरत-ज्यों, लङ्कापति मन भायो ||
करपङ्कज सिर परसि अभय कियो, जनपर हेतु दिखायो |
तुलसिदास रघुबीर भजन करि को न परमपद पायो ?||
