(45)
सत्य कहौं मेरो सहज सुभाउ |
सुनहु सखा कपिपति लङ्कापति, तुम्ह सन कौन दुराउ ||
सब बिधि हीन-दीन, अति जड़मति जाको कतहुँ न ठाउँ |
आयो सरन भजौं, न तजौं तिहि, यह जानत रिषिराउ ||
जिन्हके हौं हित सब प्रकार चित, नाहिन और उपाउ |
तिन्हहिं लागि धरि देह करौं सब, डरौं न सुजस नसाउ ||
पुनि पुनि भुजा उठाइ कहत हौं, सकल सभा पतिआउ |
नहि कोऊ प्रिय मोहि दास सम, कपट-प्रीति बहि जाउ ||
सुनि रघुपतिके बचन बिभीषन प्रेम-मगन, मन चाउ |
तुलसिदास तजि आस-त्रास सब ऐसे प्रभु कहँ गाउ ||