भारत की संस्कृति के लिए... भाषा की उन्नति के लिए... साहित्य के प्रसार के लिए
इ डांडि कांठि रलि जब तलक / ओम बधानी
Kavita Kosh से
इ डांडि कांठि रलि जब तलक
तेरि मेरि /मेरि तेरि
माया क गीत गालि तब तलक
इ डांडि कांठि रलि जब तलक
य सन्ता आज की नी जुगु की चलीं छ
किताबि खपि गिन खार्यों अजौं भि बचीं छ
जिकुड़्यौं हूक रालि जब तलक
इ डांडि कांठि रलि जब तलक
तेरि मेरि माया का गीत गालि तब तलक
रूप बदली गिन ,काया बदली ग्याई
जोनि बदली गिन,माया ज्यूंदि राई
दैब की रंचणा रलि जब तलक
इ डांडि कांठि रलि जब तलक
तेरि मेरि माया का गीत गालि तब तलक
अन्न भूख बणी,पाणि तीस बणी
आंखि उज्याळू बणी,माया रीस बणी
एक हैंका पुर्यौंला तब तलक
इ डांडि कांठि रलि जब तलक
तेरि मेरि माया का गीत गालि तब तलक
ज्वान मायादारू क आणा पखणौ मजी
दाना सयाणौ क,गाळि औळाणौ मजी
ज्यूंदा छौं ज्यूंदा रौंला तब तलक
इ डांडि कांठि रलि जब तलक
तेरि मेरि माया का गीत गालि तब तलक
