पती / पोपटी हीरानन्दाणी
हीउ घरु मुंहिंजो आहे
हिते मां तोखे छुहां थो
सिंघां थो,
चुमां थो
ऐं माणियां थो,
इन करे ई मां तोखे
पंहिंजे घर में रखां थो।
घर में संगमरमर आहे,
फ़रनीचर आहे
मथे छिति ऐं पासनि खां
दीवार आहे
हुन भरि मुंहिंजो कमरो
ऐं हिन भरि तुंहिंजो रंधिणो
तूं मूं लाइ रोटी पचाईं थी
इन करे ई मां तोखे
ॿ रोटियूं
खाइण लाइ ॾियां थो।
घर में ॿार आहिनि
जे मुंहिंजा ई आहिनि
उहे
हिति हिन लोक में
मुंहिंजो धनु सफ़ल कनि था
ऐं हुते हुन लोक में
मूंखे श्राद्ध द्वारां
खाधो खाराईनि था
ऐं जलु पीआरीनि था
तो मुंहिंजे ॿारनि खे
ॼणियो आहे
इन करे तोखे
जननीअ जोपदु मिलियो आहे
पर जेकॾहिं मां
इन्हनि, ॿारनि जे
पिता हुअण खां इनकारु करियां
त तूं पंहिंजो पदु
विञाए विहन्दीअं
तूं सॼे जी सॼी
मुंहिंजी आहीं
तुंहिंजो या तो वटि
जेकी कुझु आहे
सभु मुंहिजो ई आहे
ऐं मां?
मुंहिंजी ॻाल्हि सफ़ा ॿी आहे
छाकाणि त
मां तुंहिंजो पती आहियां।
(1.4, मां सिंधिणि-1988)
