भारत की संस्कृति के लिए... भाषा की उन्नति के लिए... साहित्य के प्रसार के लिए
पद 131 से 140 तक / तुलसीदास / पृष्ठ 10
Kavita Kosh से
पद (136-11) से (136-12) तक
(136-11)
सेवत साधु द्वैत-भय भागै।
श्रीरघुबीर-चरन लय लागै।।
देह-जनित बिकार सब त्यागै।
तब फिरि निज स्वरूप अनुरागै।।
अनुराग सो निज रूप जो जगतें बिलच्छन देखिये।
सन्तोष, सम, सीतल, सदा दम, देहवंत न लेखिये।
निरमल, निरामय, एकरस, तेहि हरष- सेाक न ब्यापई।
त्रैलोक-पावन सो सदा जाकी दसा ऐसी भई।।
(136-12)
जो तेहि पंथ चलैं मन लाई।
तौ हरि काहे न होहिं सहाई।
जो मारग श्रुति-साधु दिखावै।
तेहि पथ चलत सबै सुख पावै।।
पावै सदा सुख हरि-कृपा, संसार -आसा तजि रहै।
सपनेहुँ नहीं सुख द्वैत-दरसन, बात कोटिक को कहै।।
द्विज, देव, गुरू , हरि , संत बिनु संसार-पार न पाइये।
यह जानि तुलसीदास त्रासहरन रमापति गाइये।।
