ऊधौ! तुम तो बड़े बिरागी / हनुमानप्रसाद पोद्दार

हिन्दी शब्दों के अर्थ उपलब्ध हैं। शब्द पर डबल क्लिक करें। अन्य शब्दों पर कार्य जारी है।

ऊधौ ! तुम तो बड़े बिरागी।
हम तो निपट गँवारि ग्वालिनीं, स्याम-रूप-‌अनुरागी॥
जेहि छिन प्रथम स्याम-छबि देखी, तेहि छिन हृदय समानी।
निकसत नहिं अब कौनेहू बिधि रोम-रोम उरझानी॥
आठों जाम मगन मन निरखत स्याम-मुरति निज माहीं।
दृग नहिं पेखत अन्य बस्तु जग, बुद्धि बिचारत नाहीं॥
ऊधौ ! तुहरौ ग्यान निरंतर हो‌उ तुमहिं सुखकारी।
हम तौ सदा स्याम-रँग राचीं ताहि न सकहिं उतारी॥