त्रिभंग मूरति सोहान गे दूती! / भवप्रीतानन्द ओझा

गोपिनी द्वारा कृष्ण-रूप-वर्णन

त्रिभंग मूरति सोहान गे दूती!
श्यामली सूरति सोहान।

नील कमल-वदन,
भौंआ धनुका जैसन,
नैना सें मारेॅ हियाँ वाण गे दूती!

नील अंगे पीताम्बर,
मेघें बिजुली सुंदर,
बिहुँसी केॅ छीने नारी-प्राण गे दूती!

देखी केॅ रूप-विलास,
नें मिटेॅ आँखी पियास,
भामिनी तेजेॅ अभिमान, गे दूती!

ब्रज-वधू लागी,
वंशी टेरे राती-राती जागी,
भवप्रीताक हरि-पदें ध्यान, गे दूती!