नागमती-संदेश-खंड / मलिक मोहम्मद जायसी का स्रोत देखें

{{KKGlobal}}
{{KKRachna
|रचनाकार=मलिक मोहम्मद जायसी
}} 

'''मुखपृष्ठ: [[पद्मावत / मलिक मोहम्मद जायसी]]'''

फिरि फिरि रोव, कोइ नहीं डोला । आधी राति बिहंगम बोला ॥<br>
"तू फिरि फिरि दाहै सब पाँखी । केहि दुख रैनि न लावसि आँखी"<br>
नागमती कारन कै रोई । का सोवै जो कंत-बिछोई ॥<br>
मनचित हुँते न उतरै मोरे । नैन क जल चुकि रहा न मोरे ॥<br>
कोइ न जाइ ओहि सिंगलदीपा । जेहि सेवाति कहँ नैना सीपा ॥<br>
जोगी होइ निसरा सो नाहू । तब हुँत कहा सँदेस न काहू ॥<br>
निति पूछौं सब जोगी जंगम । कोइ न कहै निज बात, बिहंगम !॥<br><br>

चारिउ चक्र उजार भए, कोइ न सँदेसा टेक ।<br>
कहौं बिरह दुख आपन, बैठि सुनहु दँड एक ॥1॥<br><br>

तासौं दुख कहिए, हो बीरा । जेहिं सुनि कै लागै पर पीरा ॥<br>
को होइ भिउ अँगवे पर -दाहा । को सिंघल पहुँचावै चाहा ?॥<br>
जहँवाँ कंत गए होइ जोगी । हौं किंगरी भइ झूरि बियोगी ॥<br>
वै सिंगी पूरी, गुरु भेंटा । हौं भइ भसम, न आइ समेटा ॥<br>
कथा जो कहै आइ ओहि केरी । पाँवर होउँ, जनम भरि चेरी ॥<br>
ओहि के गुन सँवरत भइ माला । अबहुँ न बहुरा उडिगा छाला ॥<br>
बिरह गुरू, खप्पर कै हीया । पवन अधार रहै सो जीया ॥<br><br>

हाड भए सब किंगी, नसैं भई सब ताँति ।<br>
रोवँ रोवँ तें धुनि उठैं, कहौं बिथा केहि भाँति ? ॥2॥<br><br>

पदमावति सौं कहेहु, बिहंगम । कंत लोभाइ रही करि संगम ॥<br>
तू घर घरनि भई पिउ-हरता । मोहि तन दीन्हेसि जप औ बरता ॥<br>
रावट कनक सो तोकहँ भएऊ । रावट लंक मोहिं कै गएऊ ॥<br>
तोहि चैन सुख मिलै सरीरा । मो कहँ हिये दुंद दुख पूरा ॥<br>
हमहुँ बियाही संग ओहि पीऊ । आपुहि पाइ जानु पर-जीऊ ॥<br>
अबहुँ मया करु, करु जिउ फेरा । मोहिं जियाउ कंत देइ मेरा ॥<br>
मोहिं भोग सौं काज न बारी । सौंह दीठि कै चाहनहरी ॥<br><br>

सवति न होहि तू बैरिनि, मोर कंत जेहहि हाथ ।<br>
आनि मिलाव एक बेर, तोर पाँय मोर माथ ॥3॥<br><br>

रतनसेन कै माइ सुरसती । गोपीचंद जसि मैनावती ॥<br>
आँधरि बूढि होइ दुख रोवा । जीवन रतन कहाँ दहुँ खोवा ॥<br>
जीवन अहा लीन्ह सो काढी । भइ विनु टेक, करै को ठाढी ?॥<br>
बिनु जीवन भइ आस पराई । कहाँ सो पूत खंभ होइ आई ॥<br>
नैन दीठ नहिं दिया बराहीं । घर अँधियार पूत जौ नाहीं ॥<br>
को रे चलै सरवन के ठाँऊ । टेक देह औ टेकै पाऊँ ॥<br>
तुम सरवन होइ काँवरि सजा । डार लाइ अब काहे तजा ?॥<br><br>

"सरवन! सरवन!" ररि मुई माता काँवरि लागि ।<br>
तुम्ह बिनु पानि न पावैं, दसरथ लावै आगि ॥4॥<br><br>

लेइ सो सँदेश बिहंगम चला । उठी आगि सगरौं सिंगला ॥<br>
बिरह-बजागि बीच को ठेघा ?। धूम सो उठा साम भए मेघा ॥<br>
भरिगा गगन लूक अस छूटे । होइ सब नखत आइ भुइँ टूटे ॥<br>
जहँ जहँ भूमि जरी भा रेहू । बिरह के दाघ भई जनु खेहू ॥<br>
राहु केतु, जब लंका जारी । चिनगो उडी चाँद महँ परी ॥<br>
जाइ बिहंगम समुद डफारा । जरे मच्छ पानी भा खारा ॥<br>
दाधे बन बीहड, जड, सीपा । जाइ निअर भा सिंघलदीपा ॥<br><br>

समुद तीर एक तरिवर, जाइ बैठ तेहि रूख ।<br>
जौ लगि कहा सदेस नहि, नहिं पियास, नहिं भूख ॥5॥<br><br>

रतनसेन बन करत अहेरा । कीन्ह ओही तरिवर-तर फेरा ॥<br>
सीतल बिरिछ समुद के तीरा । अति उतंग ओ छाँह गँभीरा ॥<br>
तुरय बाँधि कै बैठ अकेला । साथी और करहिं सब खेला ॥<br>
देखत फिरै सो तरिवर-साखा । लाग सुनै पंखिन्ह कै भाखा ॥<br>
पंखिन महँ सो बिहंगम अहा । नागमती जासौं दुख कहा ॥<br>
पूछहिं सबै बिहंगम नामा । अहौ मीत! काहै तुम सामा ?॥<br>
कहेसि "मीत! मासक दुइ भए । जंबूदीप तहाँ हम गए ॥<br><br>

नगर एक हम देखा, गढ चितउर ओहि नाँव ।<br>
सो दुख कहौं कहाँ लगि, हम दाढे तेहिं ठावँ ॥6॥<br><br>

जोगी होइ निसरा सो राजा । सून नगर जानहु धुंध बाजा ॥<br>
नागमती है ताकरि रानी । जरी बिरह, भइ कोइल-बानी ॥<br>
अब लगि जरि भइ होइहि छारा । कही न जाइ बिरह कै झारा ॥<br>
हिया फाट वहव जबहिं कूकी । परै आँसु सब होइ होइ लूकी ॥<br>
चहूँ खंड छिटकी वह आगी । धरती जरति गगन कहँ लागी ॥<br>
बिरह-दवा को जरत बुझावा ?। जेहि लागै सो सौंहैं धावा ॥<br>
हौं पुनि तहाँ सो दाढै लागा । तन भा साम, जीउ लेइ भागा ॥<br><br>

का तुम हँसहु गरब कै, करहु समुद महँ केलि ।<br>
मति ओहि बिरहा बस परै, दहै अगिनि जो मेलि"॥7॥<br><br>

सुनि चितउर-राजा मन गुना । बिदि-सँदेस मैं कासौं सुना ॥<br>
को तरिवरि पर पंखि-बेखा । नागमति कर कहै सँदेसा ?॥<br>
को तुँ मीत मन-चित्त-बसेरु । देव कि दानव पवन पखेरू ?॥<br>
ब्रह्म बिस्नु बाचा है तोही । सो निज बात कहै तू मोही ॥<br>
कहाँ सो नागमती तैं देखी ।कहेसि बिरह जस मनहिं बिसेखी ॥<br>
हौं सोई राजा भा जोगी । जेहि कारन वह ऐसि बियोगी ॥<br>
जस तूँ पंखि महूँ दिन भरौं । चाहौं कबहि जाइ उडि परौं ॥<br><br>

पंखि! आँखि तेहि मारग लागी सदा रहाहिं ।<br>
कोइ न सँदेसी आवहिं, तेहि क सँदेश कहाँहिं ॥8॥<br><br>

पूछसि कहा सँदेस-बियोगू । जोगी भए न जानसि भोगू ॥<br>
दहिने संख न सिंगी पूरै । बाएँ पूरि राति दिन झूरै ॥<br>
तेलि बैल जस बावँ फिराई । परा भँवर महँ सो न तिराई ॥<br>
तुरय, नाव, दहिने रथ हाँका । बाएँ फिरै कोहाँर क चाका ॥<br>
तोहिं अस नाहीं पंखि भुलाना । उडे सो आव जगत महँ जाना ॥ <br>
एक दीप का आएउँ तोरे । सब संसार पाँय-तर मोरे ॥<br>
दहिने फिरै सो अस उजियारा । जस जग चाँद सुरुज मनियारा ॥<br><br>

मुहमद बाईं दिसि तजा, एक स्रवन, एक आँखि ।<br>
जब तें दाहिन होइ मिला बोल पपीहा पाँखि ॥9॥<br><br>

हौं धुव अचल सौं दाहिनि लावा । फिर सुमरु चितुउर-गढ आवा ॥<br>
देखेउँ तोरे मँदिर घमोई । मातु तोहि आँधरि भइ रोई ॥<br>
जस सरवन बिनु अंधी अंधा । तस ररि मुई, तोहि चित बँधा ॥<br>
कहेसि मरौं, को काँवरि लेइ ?। पूत नाहिं, पानी को तेई ?॥<br>
गई पियास लागि तेहि साथा । पानि दीन्ह दशरथ के हाथा ॥<br>
पानि न पिये, आगि पै चाहा । तोहि अस सुत जनमे अस लाहा ॥<br>
होइ भगीरथ करु तहँ फेरा । जाहि सवार, मरन कै बेरा ॥<br><br>

तू सपूत माता कर , अस परदेस न लेहि ।<br>
अब ताईं मुइ होइहि, मुए जाइ गति तेहि ॥10॥<br><br>

नागमति दुख बिरह अपारा । धरती सरग जरै तेहि झारा ॥<br>
नगर कोट घर बाहर सूना । नौजि होइ घर पुरुष-बिहूना ॥<br>
तू काँवरू परा बस टोना । भूला जोग, छरा तोहि लोना ॥<br>
वह तोहि कारन मरि भइ छारा । रही नाग होइ पवन अधारा ॥<br>
कहुँ बोलहि `मो कहँ लेइ खाहू'। माँसु न, काया रचै जो काहू ॥<br>
बिरह मयूर, नाग वह नारी । तू मजार करु बेगि गोहारी ॥<br>
माँसु गिरा, पाँजर होइ परी । जोगी ! अबहुँ पहुँचु लेइ जरी ॥<br><br>

देखि बिरह-दुख ताकर मैं सो तजा बनवास ।<br>
आएउँ भागि समुद्रतट तबहुँ न छाडै पास ॥11॥<br><br>

अस परजरा बिरह कर गठा । मेघ साम भए धूम जो उठा ॥<br>
दाढा राहु, केतु गा दाधा । सूरज जरा, चाँद जरि आधा ॥<br>
औ सब नखत तराईं जरहीं । टूटहिं लूक धरति महँ परहीं ॥<br>
जरै सो धरती ठावहिं ठाऊँ । दहकि पलास जरै तेहि दाऊ ॥<br>
बिरह-साँस तस निकसै झारा । दहि दहि परबत होहिं अँगारा ॥<br>
भँवर पतंग जरैं औ नागा । कोइल, भुजइल, डोमा कागा ॥<br>
बन-पंखी सब जिउ लेइ उडे । जल महँ मच्छ दुखी होइ बुडे ॥<br><br>

महूँ जरत तहँ निकसा, समुद बुझाएउँ आइ ।<br>
समुद, पान जरि खार भा, धुँआ रहा जग छाइ ॥12॥<br><br>

राजै कहा, रे सरग सँदेसी । उतरि आउ, मोहिं मिलु, रे बिदसी ॥<br>
पाय टेकि तोहि लायौं हियरे । प्रेम-सँदेस कहहु होइ नियरे ॥<br>
कहा बिहंगम जो बनवासी । "कित गिरही तें होइ उदासी ?॥<br>
"जेहि तरवर-तर तुम अस कोऊ । कोकिल काग बराबर दोऊ ॥<br>
"धरती महँ विष-चारा परा । हारिल जानि भूमि परिहरा ॥<br>
"फिरौं बियोगी डारहि डारा । करौं चलै कहँ पंख सँवारा ॥<br>
"जियै क घरी घटति निति जाहीं । साँझहिं जीउ रहै, दिन नाहीं ॥<br><br>

जौ लहि फिरौं मुकुत होइ परौं न पींजर माँह ।<br>
जाउ बेगि थल आपने, है जेहि बीच निबाह"" ॥13॥<br><br>

कहि संदेस बिहंगम चला । आगि लागि सगरौं सिघला ॥<br>
घरी एक राजा गोहराबा । भा अलोप, पुनि दिस्टि न आवा ॥<br>
पंखी नावँ न देखा पाँखा । राजा होइ फिरा कै साँखा ॥<br>
जस हैरत वह पंखि हेराना । दिन एक हमहूँ करब पयाना ॥<br>
जौ लगि प्रान पिंड एक ठाऊँ । एक बार चितउर गढ जाऊँ ॥<br>
आवा भँवर मंदिर महँ केवा । जीउ साथ लेइ गएउ परेवा ॥<br>
तन सिंघल, मन चितउर बसा । जिउ बिसँभर नागिनि जिमि डसा ॥<br><br>

जेति नारि हँसि पूछहिं अमिय-बचन जिउ-तंत ।<br>
रस उतरा, बिष चढि रहा, ना ओहि तंत न मंत ॥14॥<br><br>

बरिस एक तेहि सिंगल भएऊ । भौग बिलास करत दिन गयऊ ॥<br>
भा उदास जौ सुना सँदेसू । सँवरि चला मन चितउर देसू ॥<br>
कँवल उदास जो देखा भँवरा । थिर न रहै अब मालति सँवरा ॥<br>
जोगी, भवरा, पवन परावा । कित सो रहै जो चित्त उठावा ?॥<br>
जौं पै काढ देइ जिउ कोई । जोगी भँवर न आपन होई ॥<br>
तजा कवल मालति हिय घाली । अब कित थिर आछै अलि , आली ॥<br>
गंध्रबसेन आव सुनि बारा । कस जिउ भएउ उदास तुम्हारा ?॥<br><br>

मैं तुम्हही जिउ लावा, दीन्ह नैन महँ बास ।<br>
जौ तुम होहु उदास तौ यह काकर कबिलास ? ॥15॥<br><br>



(1) कारन कै = करुणा करके (अवध) तब हुँत = तब से । टेक = ऊपर लेता है । 

(2) बीरा = भाई । भिउँ = भीम । अँगवै = अंग पर सहे । चाहा = खबर । पाँवरि = जूती ।

(3) घर = अपने घर में ही । घरनि = घर वाली, गृहिणी । रावट = महल । लंक =जलती हुई
लंका ।
चाहनहारी = देखनेवाली । 

(4) खंभ = सहारा । बराहीं जलते हैं । सरवन = `श्रमणकुमार'
जिसकी कथा उत्तरापथ में घर घर प्रसिद्ध है । काँवरि = बाँस के डंडे के दोनों छोरों 
पर बँधे हुए झाबे, जिनमे तीर्थयात्री लोग गंगाजल आदि लेकर चला करते हैं । (सरवन 
अपने माता = पिता को काँवरि में बैठाकर ढोया करते थे )।
ठेघा = टिका, ठहरा । डफारा = चिल्लाया । 

(7) धुँध बाजा = धुंध या अंधकार छाया । 
बानी = वर्ण की । भइ होइहि = हुई होगी । झार = ज्वाला । लूकी = लुक । 
दवा = दावाग्नि ।

(8) बसेरू = वसनेवाला । दिन भरौं = दिन बिताता हूँ । महूँ = मैं भी । 

(9) दहिने संख 
= दक्षिणावर्त शंख नहीं फूँकता । झूरै = सूखता है । तिराई = पानी के ऊपर आता है ।
तोहिं अस...भुलाना = पक्षी तेरे ऐसा नहीं भूले हैं, वे जानते हैं कि हम उडने के 
लिए इस संसार में आए हैं । मनियार = रौनक, चमकता हुआ । मुहमद बाँई...आँखि = मुम्मद 
कवि ने बाईं ओर आँख और कान करना छोड दिया (जायसी काने थे भी) अर्थात् वाम मार्ग 
छोडकर दक्षिण मार्ग का अनुसरण किया । बोल = कहलाता है । 

(10) दाहिन लावा = प्रदक्षिणा की । घमोई = सत्यानासी या भँडभाँढ नामक कंटीला पौधा जो खंडहरों या 
उजडे मकानों में प्रायः उगता है ।
सबार = जल्दी । 

(11) नौजि = न, ईश्वर न करे (अवध) । काँवरू =कामरूप में जो जादू के 
लिये प्रसिद्ध है । लोना = लोना चमारी जो जादू में एक थी । मजार = बिल्ली । 
जरी = जडी-बूटी । 

(12) परजरा = प्रज्वलित हुआ, जला । गठा = गट्ठा, ढेर । दाऊँ = 
दवाग्नि । भुजइल = भुजंगा नाम का काला पक्षी । डोमा कागा = बडा कौवा जो सर्वांग 
काला होता है । सरग सँदेसी = स्वर्ग से (ऊपर से) सँदेसा कहनेवाला । गिरही = गृह ।
हारिल...परिहरा = कहते हैं, हारिल भूमि पर पैर नहीं रखता; चंगुल में सदा लकडी लिए
रहता है जिससे पैर भूमि पर पैर न पडे । चलै कहँ = चलने के लिए । 

(14) गोहरावा = पुकारा । साँखा =शंका, चिंता । पिंड = शरीर । मंदिर महँ केवा = कमल (पद्मावती) के
घर में । बिसँभर = बेसँभाल, सुध-बुध भूला हुआ । जेति नारि = जितनी स्त्रियाँ हैं सब 
जिउ तंत = जी की बात (तत्त्व) । 

(15) परावा = पराए, अपने नहीं । चित्त उठावा = जाने
का संकल्प या विचार किया । हिय घाली = हृदय में लाकर ।