"पाथर / प्रवीण काश्‍यप" के अवतरणों में अंतर

हम थिकहुँ पाथर
कनेक हमरो देखू!
अनंतकालीन तिरस्कार
भोगलो उत्तर
नहि भेल छी निष्प्राण!
जड़ बूझल जाइत छी,
चैतन्यक सगे संग रहि कऽ!
मात्र हरियर-उष्ण वस्तु सँ,
अछि अहाँक प्रणय।
कनेक हमरो देखू प्रेमक दृष्टि सँ!
कनेक देखू हमरो मे अछि जीवन,
अन्तर्निहित एक बिन्दु पर।
घनत्व बड्ड अछि हमर जीवनक;
अहाँ पहुँचब परम बिन्दु पर?

चेतनाक ई सभटा प्रतिमान
पशु-पक्षी, नदी-नाला
एतेक चर प्रतीत होइत अछि

कियेक तऽ हमहीं संवहित कयने छी,
एहि प्रकृतिक जीवन
अपन मूल जीवन सँ!
ई सभ अछि चर
एहिलेल, कियेक त हमरा
बूझत जाइत अछि जड़!
एहि जड़ताक वेदनाक संग
हम सृष्टिक आदि काल सँ,
जीवनक एक-एक टा चेन्ह
रखने छी करेज सँ लगा,
तह पर तह सजाकऽ,
जीवनक इतिहास, वर्तमान रखने छी
प्रेम, ऊर्जा, गति, सौन्दर्य कें उघैत
आबि रहल छी अनंत यात्रा सँ।
आ जीवनक संगी बनि कऽ
करैत रहब यात्रा।
हमरा लेल ने अछि कल्प ने प्रलय!
सभ चर, जीवन, गति
शांत भऽ कऽ
हमरे में मिलि जाइत अछि;
फेर सँ एक नव जीवनक लेल
चलबाक उपक्रमक लेल!