"मा / संजय पुरोहित" के अवतरणों में अंतर

म्हैं रैयो छींयां
छीयां अर छिब
ही थांरी ई
म्हारी मा
तिसळनी जिनगी रो
चीकणो है मारग
कदैई नीं लखाई दोरफ
म्हारी पांती री थापां
थूं ई सैई
म्हारी पांती तावड़ो
थूं पोख्यो
म्हारी पांती रो सियाळो
थूं ओढ़यो
मा
म्हैं थारो इज अंस
किण भांत उतारूंला
थांरो उजगर।

इण रै बाद
म्हारै बाळां में फेरी
आपरी पोल्ली आंगळ्यां
थपकायां गाल
अणथक लडायो
नैणां सूं लाड बरसांवती बोली
जे थूं चावै
उतारणो म्हारो उजगर
तो सुण बेटा
थारै नैणां री सींव सूं बैंवती
इण गंगा रै बांध पैली पाळ
पछै खा सौगन
फेर कदै ई थूं
नीं करैला
मा रै उजगर री बातां।