"इण धरती रै ऊजळ आंगण / महेन्द्रसिंह सिसोदिया 'छायण'" के अवतरणों में अंतर

क्यूं खांचौ हो
धरम नांव री कूडी़ लीकां
क्यूं बिलमावौ
मिनख मिनख में
भेद जता नै
क्यूं फैलावौ
आज हल़ाहल़ धरम नांव रौ
क्यूंकर ठावौ
न्यारा-न्यारा
कूंतण रा मापीणा कूडा
हिंदू-मुस्लिम
ईसाई अर बौद्ध जैन रा!
क्यूं भटकावौ-
नैने नैने टाबरियां नै
गंगा-जमनी संस्कारां रै
पावन पथ सूं |

जदकै
इण धरती रै आंगण
गीत रचीज्या प्रेम-प्रीत रा
परंपरा-अपणायत रैयी
अणगिण पीढ्यां सागै बैठी
गांव-गौरवें
ढाणी-ढाणी
संबंधां रा बांध्यां तांतण |

वै ई तांतण-
जकौ बांधिया पुरखां अपणा
इतरा काचा व्है क्यूं तूटै?
किण कारण भारत रै भागां
धरम तणी तकदीरां मांडौ |

क्यूं भूलौ थै-
आज कबीरे री वाणी नै
जिण री वाणी--
सदियां तक गूंजैलां अपणी
इण धरती रै ऊजळ आंगण
क्यूंकर भूलौ-
रहीमन धागौ
प्रेम प्रीत रौ !!!
जदकै उणरा-
लोक कंठ में दूहा आछा
जीवत हैं,
जीवत रेवैलां सदियां तांई|

कींकर खोदो-
मिनखां बिच्चै खाई-खाडा !
जठै-
धरम सूं ऊपर उठनै
ब्रज काळिंदी गोकुल ग्वारन
सुणिया कई सवैया सांप्रत |
वौ रसखान-
स्याम रै रंग में
पूरौ रंगियो ऊजळ अंतस !
अर कैयौ कै-
'आठहुँ सिद्धि
नव निध रौ सुख ई
ब्रज की गाय चराई बिसारौ!'
कान्हा कान्हा करतां-करतां
जिकां सनातन रीतां राखी |
वां नै-
मत बांटो रै बीरा!
कूडी़ थोथी परिभासा में|

मत भूलौ कै-
हळदघाट रै रण-आंगण में
कितरा सूर हकीम जिसां नर
हिंदुवै सूरज सागै लड़िया|
कितरा मिटिया देस-धरम हित ?
कितरा अजलग सांसां जीवै-
उणी पंथ री
उणी रीत री |

एक'र फेरूं-
याद करौ उण पिच्छम वाळै
रूणीचै रै रामदेव नै
जिण नै सगळा
सांचैमन सूं ध्यावै-पूजै
अर सगळा ई-
पीरां रै जैकारां सागै
हिळमिळ रेवै
प्रीत वधावे!

कै जा देखो-
सिंध धरा में
पीर मोडियो कैय पूजीजै
छत्राळो आल्हो जसधारी
हिंदू अर मुसलमां सगळा
उण राहड़ पन्नड़ रै चरणां
श्रद्धा सूं ई शीश झुकावें |

कींकर भूलौ-
रतजागां में गातौ ढोली
ब्याव बधाणै आतौ ढाढी
अधरातां में झीणै-झीणै
मधरै-मधरै व़ायरियै में
रचतै मीठे लोक गीत नै
कींकर बांटो-
धरम पंथ री कांकड़ में इण
शहनाई सुरणाई ढोलक
मंजीरा झींझा तबला नै
अै साखी हैं संबंधां रा
अपणापै रा
मिनखापै अर विसवासां रा !!!

मत उळझावौ-
धरम नांव री कांकड़ में इण
हँसती- खिलती मिनखजात नै
मत बांधौ-
भौळे मिनखां नै तणकै खूंटे
मत राखौ-
ऊजळ अंतस में ऊंडी खोखा !!!