"राज्यसँग एकालाप / विप्लव ढकाल" के अवतरणों में अंतर

तिम्रो तिर्खा मेटाउन
मैले आफ्नो रगत दिएँ

तिम्रो नग्नता ढाक्न
मैले आफ्नो छाला दिएँ

तिमी भोकाएको बेला
मैले शरीरको मासु दिएँ

तिमीलाई अमर राख्न
मैले मेरो इतिहास दिएँ..

मेरो रगत,छाला, मासु र इतिहास
कहाँ फाल्यौ तिमीले?

कहाँ फाल्यौ र आज फेरि किन
मेरो छोराको अगाडि
तिमी यसरी नाङ्गै
र खाली हात उभिएका छौ?

मलाई अज्ञात सहिद बनाउने राज्य,
म यो प्रश्न तिमीलाई सोधिरहेछु ।