"बीती आखी ऊमर तनै याद करतां करतां / लक्ष्मीनारायण रंगा" के अवतरणों में अंतर

बीती आखी ऊमर तनै याद करतां करतां
धुंधळागी निजरां थारी उडीक करतां करतां

हर बादळ रै साथै म्है बहायां आंसूं इत्ता
सावण री सूखग्या साथै आंसू झरतां झरतां

तनै ढूंढणै रै खातर म्है किया सफर इत्ता
दिन-रात भी थक गया म्हारै साथ चलतां चलतां

थारी याद री अगन में म्हैं जळायो मन इत्तो
चान्द-सूरज पड़या फीका म्हारै साथ जळतां जळतां

हर जिन्दगी में मिलसां ओ कवल हो थांरो
क्यों हुयग्या जुदा थे म्हारै साथै चलतां चलतां

जुगां जुगां सूं पैछाणै ए प्यार करणवाळा
क्यों हुयग्या अणजाण थे पैछाण करतां करतां

हर जीवण बणै प्यार प्रेम इत्तो सोरो कोनी
मुस्कल सूं मिले प्यार कैई बार मरतां मरतां

हर पांव बणैं मुकाम ओ जरूरी तो कोनी
मिले प्यार री मंजल कैई जीवण चलतां चलतां

बस इत्तै सै ई दर्द सूं तड़फ उठ्यो मन
ए प्यार रा है घाव, ए भरसी भरतां भरतां

थारी बदनामी रै डरसूं न लियो नाम थारो
म्हारै होठां आयग्यो थारो नाम मरतां मरतां

हर सांस पर सदा म्हैं लियो है नाम थारो
म्हारो दम भी निकळसी थनै याद करतां करतां