"जिला छै महान / ब्रह्मदेव कुमार" के अवतरणों में अंतर

हमरोॅ ई जिला छै महान सुन गे सजनी।
जहाँ चललै साक्षरता अभियान।

अनपढ़-निरक्षर केॅ समझाय-बुझाय केॅ
पढ़ाय-लिखाय केॅ आरो साक्षर बनाय केॅ।
ई योजना छै गुणोॅ के खान सुन गे सजनी
जहाँ चललै साक्षरता अभियान।

अनपढ़ लोगोॅ सेॅ पढ़ै के अरज छै
पढ़ी-लिखी केॅ, बढ़ै के अरज छै।
देशोॅ के होतै उत्थान सुन गे सजनी
जहाँ चललै साक्षरता अभियान।

पढ़लोॅ-लिखलोॅ भाय-बहिन सें छै कहना
अनपढ़-निरक्षर सबकेॅ छै साक्षर बनाना।
जिनगी में होतै नया विहान सुन गे सजनी
जहाँ चललै साक्षरता अभियान।

पढ़ी-लिखी केॅ होतै, सब जन एक समान
पुलकित मन के पूरा होतै सभ्भेॅ ठोॅ अरमान।
चम-चम चमकतै हिन्दुस्तान सुन गे सजनी
जहाँ चललै साक्षरता अभियान।