"राज मोह / पूनम चंद गोदारा" के अवतरणों में अंतर

लूंकड़ी
घणी चालबाज बजै
कागलो
डेढ़ स्याणों चला'क

पण
आजकल रा कई
मिनख तो है
बां स्यूं च्यार चंदा चढ़ता

बैठ्या रैवे
सुदी गिला'री बण'र
चुपचाप
जिंया दापळी बिल्ली !

मौको मिल्यो
अर झाली झट गिच्ची
मरोड़ी नाड़
बंद विरोध्यां री जाड़ !

लोकतंत्र!
मूंडै मून धारेड़ो
देखतो रैवे
पितामह भीष्म री भांत

संविधान !
तकै निरा सोसका
विदुर दाईं

धृतराष्ट्र रौ राज मोह
हुवै चीर हरण
देश री राज सत्तावां रौ ।।