"अंश / सीमा आभास" के अवतरणों में अंतर

लिएको पनि यही हो
दिने पनि यही हो
अंशमा लैजानू यी सबैसबै...

दुम्सीले माडेको फापरबारी
बाँदर लाग्ने मकैबारी ।

पछ्यौरीमा पोको पारेको कोदाको बीउ
थाममा झुन्ड्याएका खुँगी र बल्छी
आँगनको कुनाको कुखुराको खोर
बुन्दाबुन्दै छोडेको डोको
एकमुठी सुकेका चोया
रित्ता कीला–दाम्ला ।

घरपर्तिरको खहरे
भूतले तर्साउने खोल्सो
लैजानू खेतमाथि बग्ने बाढी ।

लाहुरे हजुरबाले कमाएको भित्तेघडी
हजुरआमाले सिन्दुर–टीका गर्ने बट्टे ऐना
बाँसको काइँयो
लैजानू गोल्चे लगाएको सन्दुसमा
पुर्खौंदेखि लुकाएका अभाव ।
 
वर्षौंदेखि बगाएको पसिना
छानामाथि फैलने रहरजस्ता बादलका टुक्रा
जिजु–जिजुमाको आत्मा बास बसेको आँपको रुख
बा–आमाले आगो ताप्ताताप्तै निभेको चिसो अँगेनो
पानी झर्दाझर्दै धारो जमेर भरिन नपाएका गाग्री
खडेरीले खाएपछि काँक्रा–फर्सी बेरिन नपाएका थाङ्ग्रा
उठाएर लैजानू पानी नतर्ने घरको धुरी पनि ।

करेसाको घामफूल
बार्दलीको सयपत्री र मखमली माला
अँगेनामाथि ध्वाँसो लागेका कप्टेरा
सोली, फिपी, खुर्पा र कोदाली
लैजानू हिँड्दाहिँड्दै थाकेको गल्ली ।

मैले लिएको पनि यही हो
मैले दिने पनि यही हो
अंश लैजानू यी सबैसबै...

मेरा निम्ति छोडिदिनू पुर्खाले आर्जेको दुःख
छोडिदिनू यी सबैप्रतिको मेरो प्रेम !