"भन्दिनँ म भन्दिनँ / सुमन पोखरेल" के अवतरणों में अंतर

भन्दिनँ भो' भन्दिनँ, अब म केही भन्दिनँ
मेरा दु:ख हुन्‌ मैसँग; सुनाउँदिनँ, सुनाउँदिनँ

मनको नै एउटा चोट छ, कुनै दवाइले सुक्दैन
हेरेमा झनै बल्झिन्छ, छोए त झनै दुख्दछ
मभित्रै रहोस्‌ त्यो पनि, देखाउँदिनँ, देखाउँदिनँ
मेरा दु:ख हुन्‌ मैसँग, सुनाउँदिनँ सुनाउँदिनँ

एक्लै हिँडुँला अब म, लडे लडूँ हर पाइलामा
सके उठुँला आफैँ नै, या जे हुनुछ भै जाला
सहारा मागी कसैलाई, बोलाउँदिनँ, बोलाउँदिनँ
मेरा दु:ख हुन्‌ मैसँग, सुनाउँदिनँ सुनाउँदिनँ

झार्दिनँ आँसु पिउँदछु, बिझ्दिनँ अब बातले
दुखेमा मुटु समाउँछु, कामेका आफ्नै हातले
नसोध के भो' मलाई; बताउँदिनँ, बताउँदिनँ
मेरा दु:ख हुन्‌ मैसँग, सुनाउँदिनँ, सुनाउँदिनँ