"रउरा सासन के ना बड़ुए जवाब, भाईजी / विजेन्द्र अनिल" के अवतरणों में अंतर

रउरा सासन के ना बड़ुए जवाब, भाईजी,
रउरा कुरूसी से झरेला गुलाब, भाईजी

रउरा भोंभा लेके सगरे आवाज करींला,
हमरा मुंहवा प डलले बानी जाब, भाईजी

हमरा झोपड़ी में मटियो के तेल नइखे,
रउरा कोठिया में बरे मेहताब, भाईजी

हमरा सतुआ मोहाल, नइखे कफन के ठेकान,
रउआ चाभीं रोज मुरूगा-कवाब, भाईजी

राउर छंवड़ा त पढ़ेला बेलाइत जाइ के
हमरा छंवड़ा के मिले ना किताब, भाईजी

रउरा बुढि़या के गालवा प क्रीम लागेला,
हमरा नयकी के जरि गइल ख्वाब, भाईजी

रउरा कनखी प थाना अउर जेहल नाचेला,
हमरा मुअला प होला ना हिसाब, भाईजी

चाहे दंगा करवाई, चाहे गोली चलवाई,
‘देसभक्तवा’ के मिलल बा खिताब, भाईजी

ई ह कइसन लोकसाही, लड़े जनता से सिपाही,
केहू मरे, केहू ढारेला सराब, भाईजी

अब ना सहब अत्याचार, बनी हमरो सरकार,
नाहीं सहब अब राउर कवनो दाब, भाईजी

चाहे हथकड़ी लगाईं, चाहे गोली से उड़ाईं
हम त पढ़ब अब ललकी किताब, भाईजी
          
रचनाकाल : 23 अगस्त 1979