"यसरी म नयाँ ईश्वर भएँ / मौन आवाज" के अवतरणों में अंतर
Sirjanbindu (चर्चा | योगदान) ('{{KKGlobal}} {{KKRachna |रचनाकार=मौन आवाज |अनुवादक= |संग्रह= }} {{KKCatKavita}}...' के साथ नया पृष्ठ बनाया) |
(कोई अंतर नहीं)
|
11:08, 12 सितम्बर 2024 के समय का अवतरण
कान नहुनेहरूले
मेरा कानहरू काटेर लगे !
आँखा नहुनेहरूले
मेरा आँखाहरू झिकेर लगे !
नाक नहुनेहरूले
मेरो नाक भाँचेर लगे !
टाउको नहुनेहरूले
मेरो टाउको उखेलेर लगे !
हिँड्न चाहने तर / खुट्टा नहुनेहरूले
मेरा खुट्टाहरू चुँडालेर लगे !
औंला नहुनेहरूले
मेरा औंलाहरू लगे !
हात नहुनेहरूले
मेरा हातहरू लगे !
रौं नहुनेहरूले
मेरा रौंहरू लगे !
छाला नहुनेहरूले
मेरो छाला लगे !
मासु नहुनेहरूले
मेरो मासु लगे !
हड्डी नहुनेहरूले
मेरो हड्डी लगे !
लगे रगत नहुनेहरूले रगत
लगे वीर्य नहुनेहरूले वीर्य
लगे र्याल नहुनेहरूले र्याल !
खकार नहुनेहरूले खकार लगे
पिप नहुनेहरूले पिप लगे
घाउ नहुनेहरूले घाउ लगे !
दाँत लगे दाँत नहुनेहरूले
जिब्रो लगे जिब्रो नहुनेहरूले
मुख लगे मुख नहुनेहरूले !
ओठ नहुनेहरूले
मेरो ओठ लगे !
घाँटी नहुनेहरूले
मेरो घाँटी लगे !
भोकाएकाहरूले
मेरो आन्द्रा भुँडी लगे !
अघाएकाहरूले मेरो मलद्वार लगे !
निस्सासिएकाहरूले
मेरो श्वास लगे !
कामुकहरूले
मेरो यौनाङ्ग लगे !
भावुकहरूले
मेरो सम्वेदनाङ्ग लगे !
जड्हरुले
मेरो चेतनाङ्ग लगे !
विचार लगे विचार नहुनेहरूले
भावना लगे भावना नहुनेहरूले
प्रेम लगे प्रेम नहुनेहरूले !
लगे
मस्तिष्क नहुनेहरूले मेरो मस्तिष्क !
लगे
हृदय नहुनेहरूले मेरो हृदय !
बाँकी थियो रुनलाई आँशु
त्यो पनि मागेर लगे केही नहुनेहरूले !
एउटा आत्मा थियो
एउटा निजत्व थियो
त्यो पनि तिम्रो होइन भनेर परमात्माहरूले लगे !
यसरी हरेक अंगहरू सकिएपछि
म बेअंग भएँ !
एकएक गर्दै
सबै आकारहरू सकिएपछि
म निराकार भएँ !
यसरी / मपनि ईश्वर जस्तै / नयाँ ईश्वर भएँ !
०००
