"गीतावली अयोध्याकाण्ड पद 36 से 50/पृष्ठ 15" के अवतरणों में अंतर

(49)

ऋतु-पति आए भलो बन्यो बन समाज | मानो भए हैं मदन महाराज आज ||
मनो प्रथम फागु मिस करि अनीति | होरीमिस अरि पुर जारि जीति |

मारुत मिस पत्र-प्रजा उजारि | नयनगर बसाए बिपिन झारि ||
सिंहासन सैल-सिला सुरङ्ग | कानन-छबि रति, परिजन कुरङ्ग |

सित छत्र सुमन, बल्ली बितान | चामर समीर, निरझर निसान ||
मनो मधु-माधव दोउ अनिप धीर | बर बिपुल बिटप बानैत बीर |
मधुकर-सुक-कोकिलबन्दि-बृन्द | बरनहिं बिसुद्ध जस बिबिध छन्द ||

महि परत सुमन-रस फल पराग | जनु देत इतर नृप कर-बिभाग |
कलि सचिव सहित नय-निपुन मार | कियो बिस्व बिबस चारिहु प्रकार ||

बिरहिनपर नित नै परै मारि | डाँड़ियत सिद्ध-साधक प्रचारि |
तिनकी न काम सकै चापि छाँह | तुलसी जे बसहिं रघुबीर-बाँह ||