"भैया मल्हबा हो / ब्रह्मदेव कुमार" के अवतरणों में अंतर

बटोहिन- भैया मलहवा हो, नैया लगा देॅ नदिया के पार।
मल्लाह- बहिन बटोहिन गे, फूटलोॅ छै नैया, टूटलोॅ पतवार।

बटोहिन-आखरोॅ हड़िया दही खिलैबौ, दूधोॅ दियबौ ढार।
उमड़ल नदिया पार करी देॅ, टाका दियबौ चार।
भैया मलहवा हो, नैया लगा देॅ नदिया के पार।

मल्लाह- ना हम खैबोॅ दूध आरोॅ दही, ना लेबौ टकवा चार।
आपनोॅ नाम जे लिख दे बहिनियाँ
नैया में लिख दे हमार।
बहिन बटोहिन गे, तोहरा उतारी देबौ हमेॅ पार।

बटोहिन- हम्में तोरा देबौ कतरी-मठिया, छनमा देबौ उतार।
कौनों उपईयाँ पार करा देॅ, गुणमां गैबो तोहार।
भैया मलहवा हो, नैया लगा देॅ नदिया के पार।

मल्लाह- ना हम लेबौ कतरी-मठिया, ना हम छनमा तोहार।
एके उपईया सुन गे बहिनियाँ, नमुवां लिख दे हमार।
बहिन बटोहिन गे, तोहरा उतारी देबौ हमेॅ पार।

बटोहिन- पढ़ै-लिखै के मरम नै जानौं, नाहीं उमरिया हमार।
कैसे नाम लिखबै हो भैया, कैसे उतरबै पार।
भैया मलहवा हो, नैया लगा देॅ नदिया के पार।


मल्लाह- पढ़ै-लिखै बिना सुन गे बहिनियाँ, बेरथ जिनगी तोहार।
पढ़ै-लिखै के करै जे परणमां, वही खेबनमा हमार।
बहिन बटोहिन गे, तोहरा उतारी देबौ हमेॅ पार।

बटोहिन- कर जोड़ूँ, पैयाँ पड़ूँ हो भैया, सुनोॅ अरजिया हमार।
कानते होतै गोदी-बलकबा, फाटै करेजबा हमार।
भैया मलहवा हो, नैया लगा देॅ नदिया के पार।

मल्लाह- हमरो अरजिया सुन गे बहिनियाँ, मनमाँ में करैं विचार।
गोदी-बलकवा संग-संग पढ़तौ, होतौ सपनमां साकार।
बहिन बटोहिन गे, तोहरा उतारी देबौ हमेॅ पार।

बटोहिन- सुन-सुन के भैया, तोरोॅ वचनमाँ, डोलै मनमां हमार।
पढ़बै-लिखबै आजू सेॅ भैया, यही परणमां हमार।
भैया मल्हवा हो, नैया लगा देॅ नदिया के पार।

मल्लाह-चाहेॅ फूटलोॅ नैया हमरोॅ, चाहेॅ टूटलोॅ पतवार।
साक्षरता के नैया से बहिनियाँ, जिनगी के नदिया पार।
बहिन बटोहिन गे, तोहरा उतारी देबौ हमेॅ पार।

बटोहिन- भैया मलहवा हो, नैया लगा देॅ नदिया के पार।
मल्लाह- बहिन बटोहिन गे, तोहरा उतारी देबौ हमेॅ पार।