भारत की संस्कृति के लिए... भाषा की उन्नति के लिए... साहित्य के प्रसार के लिए
Changes
Kavita Kosh से
|रचनाकार=कानदान कल्पित
|संग्रह=
}}{{KKVID|v=LyO3hC8Ph5o}}
{{KKCatRajasthaniRachna}}
{{KKCatKavita}}
<poem>
मखमल बेळू रेत,रमै नित राम जठै ।जठै।मुरधर म्हारो देश,झोरडो़ गांव जठै ॥जठै॥
सोनै जैडी़ रेत मसळता हाथां में
रमता कान्ह गुवाळ बण्योडा़ खेतां में
जीवण रा चित्राम मंड़योडा़ रेतां में
मुळकै मूक सजीव,.पड़या सैनाण जठै ।जठै।मुरधर म्हारो देश,झोरडो़ गांव जठै ॥जठै॥
नामी नगर नागौर नगीणा न्यारा है
जोधाणै नर तेज जियां तलवारां है
बीकाणा सिर मौड़ फ़णी फ़ुंफ़कारां है
जौहर जैसलमेर ,ज़बर झुंझार जठै ।जठै।मुरधर म्हारो देश,झोरडो़ गांव जठै ॥जठै॥
जंगी गढ़ चितौड़ धाक रणधीरां री
जैपर गुलाबी सैर हार लड़ हीरां री
जंतर-मंतर म्हैल,माळिया और कठै।
मुरधर म्हारो देश,झोरडो़ गांव जठै ॥जठै॥
ऊंचो गढ़ गिगनार आबू हज़ारां में
मस्त नज़ारा देख,चंबल री धारां में
पग-पग पर घनघोर,घुरया घमसाण जठै।
मुरधर म्हारो देश,झोरडो़ गांव जठै ॥जठै॥
खेत,करम,नितनेम,धरम री पोथी है
कामगरा,किरसाण,जागती जोती है
जीवै मैणत पाण,मानवी देख जठै।
मुरधर म्हारो देश,झोरडो़ गांव जठै ॥जठै॥
जीवण रो आधार,एक ही खेती है
बरसै सावण मास अणंद कर देती है
बाज़र,मोठ,गुंवार,मूंग-कण मोती है
काचर,बोर,मतीर,मेवा मिस्टाण जठै ।जठै।मुरधर म्हारो देश,झोरडो़ गांव जठै ॥जठै॥
करै कोयला डील,तपै ज्यूं धाणी है
जीवत बाळै खाल,मूंढै मुळकाणी है
खड़यो तावडै़ लाय,धुंवां धकरॊळ उठै।
मुरधर म्हारो देश,झोरडो़ गांव जठै ॥जठै॥
लंबा काळा केस लूंबा लट्ट नागणियां
पतळी कमरां होठ गुलाबी-सी कळियां
मीठा मिसरी बोल,कंवळ-तन कामणियां
पणघट पग पणिहार,पायल री झणकार उठै ।उठै।मुरधर म्हारो देश,झोरडो़ गांव जठै ॥जठै॥
काम पड़यां हर नार,झांसी राणी है
घुरतां घोर निसाण हुया अगवाणी है
नर सिमरथ मजबूत पगां में पाणी है
हंसता-हंसता सीस , सौंप दै बात सटै ।सटै।मुरधर म्हारो देश,झोरडो़ गांव जठै ॥जठै॥
माणस मूंघा जाण जिता जळ ऊंडा है
जीव थकां लै खोस कुणां रा मूंडा है
छेड़यां काळै नाग सरीखा भूंडा है
रण में बबरी सेर ,सरीसा भभक उठै ।उठै।मुरधर म्हारो देश,झोरडो़ गांव जठै ॥जठै॥ मखमल बेळू रेत,रमै नित राम जठै ।जठै।मुरधर म्हारो देश,झोरडो़ गांव जठै ॥जठै॥
</poem>
