"थारै पछै (1) / वासु आचार्य" के अवतरणों में अंतर

क्या हुयौ
क्या नीं हुयौ
क्या सूं क्या हुयग्यौ

धरती पिघल‘र
बणगी दरियाव
छायगी सून च्यांरूमैर

बै सै ठौडा
जाणै ज्वालामुखी रै
धधकतै लावै मांय
भसम हुयगी

जठै कदै-कोई सुपनो
कोई ‘लैरियौ’
कोई ‘मोरियौ’
आपरै ई सुरताळ मांय
गूंजतौ हो
पून रा लैरका सागै
म्हैं जीवू तो हूं
बिया‘र बिया
लागण मांय ओई लागै
दीखण मांय भी
कीं नीं दीखै
सौ की सावळ‘ई लागै
पण म्हारो-ओ बगत
उबळतै तैल रै
कड़ाव सूं बतौ‘ई है
जिण मांय तिल तिल
बळतौ जाय रैयौ है
म्हारो रूं रूं

साची बात तो आ है-
क मनै ठा इ नीं
लाग रैई है
क कोई मुड़दो
जी रैयौ है -
म्हारै मांय
या कोई मुड़दै मांय म्हैं

थारै पछै
थारै पछै