भारत की संस्कृति के लिए... भाषा की उन्नति के लिए... साहित्य के प्रसार के लिए
ललचाई आँखिन ते बेटवा / बोली बानी / जगदीश पीयूष
Kavita Kosh से
सशुल्क योगदानकर्ता ४ (चर्चा | योगदान) द्वारा परिवर्तित 07:42, 24 मार्च 2019 का अवतरण
ललचाई आँखिन ते बेटवा
द्याखै गुड़ कै पारी
ऊपर ते मिठबोलना बनिया
टेंटे धरे दुधारी
खाय रहा कोउ दाख छोहारा
कोऊ फ्याँटै गड्डी
लरिकउना भूखन के मारे
ख्यालति नहीं कबड्डी
मरै जियै के साथी
ट्वाला मा अब नहीं रहे
अमराइन पर रोजु चलति है
अब स्वारथ कै आरी
हम बरधन-घोड़वन की नाँई
मेहनति करति रहेन
जोर-जुलुम मौसम के चाबुक
अब लौ खूब सहेन
हाँथ-पाँव सब दगा दइ रहे
अब तौ ताब नहीं
अइसे-मन मनचले परोसी
हम पर किहे सवारी
नाम डकैती मा लिखवाइनि
जब ते भइया क्यार
सच्चाई का मिल न सका
तब कोउ जमानतदार
रस्ता बदल लेति हैं
दुरिही ते अब नातेदार
दुआ बंदगिउ करै न कोऊ
है ई बिधि लाचारी
