भारत की संस्कृति के लिए... भाषा की उन्नति के लिए... साहित्य के प्रसार के लिए
आ बैठ बात करां / रामस्वरूप किसान
Kavita Kosh से
अनिल जनविजय (चर्चा | योगदान) द्वारा परिवर्तित 18:45, 4 नवम्बर 2010 का अवतरण
आ बैठ बात करां
एक दूजै नै देखां
कित्ता बरस बीतग्या
सागै रैंवतै थकां,
कित्ता नेड़ै-नेड़ै रैया आपां
पण देख नीं सक्या
एक दूजै नै ।
झूठ नीं बोलूं
म्हैं तो नीं देख सक्यो
थारी थूं जाणै ।
बरत्यो अवस है
थारो रूं-रूं
पण देख नीं सक्यो
ठोडी रो तिल
जकै रौ रंग
म्हारी अणदेखी रै अंधारै रळग्यो ।
माफ करज्यो
औसाण ही नीं मिल्यो
अ दांत कद टूटग्या थारा?
अर ऐ धोळा बाळ?
आ बैठ, गौर सूं देखूं थनै
कदे भाजो-भाज में
आ जिनगाणी भाज नीं जावै।
