भारत की संस्कृति के लिए... भाषा की उन्नति के लिए... साहित्य के प्रसार के लिए
चानणों / श्याम महर्षि
Kavita Kosh से
आशिष पुरोहित (चर्चा | योगदान) द्वारा परिवर्तित 14:37, 14 जनवरी 2011 का अवतरण (नया पृष्ठ: {{KKGlobal}} {{KKRachna |रचनाकार=श्याम महर्षि |संग्रह=अड़वो / श्याम महर्षि }} [[Category:…)
ऊगतै सूरज रो उजास
नूंतै म्हनै
इण सूं घणौ अळगौ नीं हैं
हियै रो चानणौं,
चानणै रा मग्गर
जोंवतो-जोंवतो
व्हीर हुयग्यो उण रै लारै
इण खातर कै
कदास करूं गिंगरथ उण सूं,
चानणौ
बावड़‘र कदैई
नीं जोयो म्हनैं
पण
चानणै रो मुहण्डो
जोवणै खातर
बगतो रैया हूं उणरै लारै
लगोलग,
पांवडा-दर-पांवडा
बगतां थकां
ओज्यूं तांई दिखै फकत
उण रा मग्गर
ठा नीं कद दिखैलो उण रो
ऊजळो मुहण्डो,
चानणै लारै बगणौ
अर चानणै रो
मुंहडो जौवणों
म्हरौ धरम है।
