भारत की संस्कृति के लिए... भाषा की उन्नति के लिए... साहित्य के प्रसार के लिए
बर्सातमा / सुदीप पाख्रिन
Kavita Kosh से
Sirjanbindu (चर्चा | योगदान) द्वारा परिवर्तित 17:49, 27 जुलाई 2020 का अवतरण (Sirjanbindu ने बर्सातमा / सुदीप पाख्रीन पृष्ठ बर्सातमा / सुदीप पाख्रिन पर स्थानांतरित किया)
बर्सातमा....
बेसोमति नदीहरु
आफ्नो धार छाडी किनारबाट उक्लन्छन
र, कुद्छन छानाहरुमाथिबाट
गल्लीहरुमा, चौकहरुमा अफ्ठ्यारै नमानी
बर्सातमा....
नग्न खोलाहरु
बगरहरु उक्ली सतहबाट हुइकन्छन्
र, उर्लन्छन मानिसहरुमाथि
बस्तीहरुमा, गाउँहरुमा लाजै नमानी
बर्सातमा....
धमिलो, आँखा नभएको
मृत्युको छायाँ सल्बलाउँदछ - पानीमा
बर्सातमा....
मृत्यु
स्वयं गड्गडाउँदै बग्दछ - पानीमा
बर्सातमा नै त....
कुवाभित्रका भ्यागुताहरु
घमन्डले अझ उन्मत्त भै टर्टराउने गर्दछन
आफु मात्रै 'ठूलो' हुनुको भ्रममा
'हुनु' हुने गर्दछन - बर्सातमा !
'नहुनु' पनि हुने गर्दछन - बर्सातमा !!
त्यसैले
बर्सातमा....
बोल्न खोज्नेहरु नबोल्नु
बर्सातका झर.... झर.... माझ
'बोल्नु' को औचित्य कहाँ हुन्छ र ?
