कल़ायण ! / मनुज देपावत
धरती रौ कण -कण ह्वे सजीव,मुरधर में जीवण लहरायौ ।
वा आज कल़ायण घिर आयी ,बादळ अम्बर मं गहरायो ।।
वा स्याम वरण उतराद दिसा ,"भूरोड़े- भुरजां" री छाया !
लख मोर मोद सूँ नाच उठ्यौ ,वे पाँख हवा मं छितरायाँ ।।
तिसियारै धोरां पर जळकण ,आभै सूँ उतर-उतर आया ।
ज्यूँ ह्वे पुळकित मन मेघ बन्धु ,मुरधर पर मोती बरसाया ।।
बौ अट्टहास सुन बादळ रौ,धारोल़ा धरती पर आया ।
धडकै सूँ अम्बर धूज उठ्यौ ,कांपी चपल़ा री कृस काया ।।
पण रुक-रुक नै धीरै -धीरै ,वां बूंदा रौ कम हुयौ बेग ।
यूं कर अमोल निधि -निछरावळ ,यूं बरस-बरस मिट गया मेघ ।।
पणघट पर 'डेडर' डहक उठ्या ,सरवर रौ हिवड़ो हुळसायौ ।
चातक री मधुर 'पिहू' रो सुर ,उणमुक्त गिगन मं सरसायौ ।।
मुरधर रे धोरां दूर हुयी ,वा दुखड़े री छाया गहरी ।
आई सावण री तीज सुखद ,गूंजी गीतां री सुर -लहरी ।।
झूलां रा झुकता "पैंग" देख तरुणा रौ हिवड़ो हरसायौ ।
सुण पड़ी चूड़ियाँ री खण -खण , वौ चीर हवा मं लहरायौ ।।
ऐ रजवट रा कर्मठ किसाण ,मेहणत रा रूप जाका नाहर ।
धरती री छाती चीर चीर, ऐ धन उगा लावै बाहर ।।
उण मेहणत रौ फळ देवण नै , सुख दायक चौमासौ आयौ ।
धरती रो कण -कण ह्वे सजीव, मुरधर मं जीवण लहरायौ ।।
