भारत की संस्कृति के लिए... भाषा की उन्नति के लिए... साहित्य के प्रसार के लिए
ऐलै फागुन के... / श्रीस्नेही
Kavita Kosh से
ऐलै फागुन के महीना हुलसै जिहरा-मोर
बागऽ में मेला लागलऽ झूला झूलै मस्त किशोरी!
डार-डार कोइलिया बोलै टपकै मद मँजरारी!!
ऐलै फागुन के महीना हुलसै जिहरा-मोर!
मटर-खेसाड़ी बूट-रहारी झुमका नाँकी झुमकै!
तीसी-जऽ गेहूँ के बाली कंगना नाँकी खनकै!!
ऐलै फागुन के महीना हुलसै जिहरा-मोर!
रात वसंती हवा में मस्ती गोर चँदवा चदरारी!
टोला-टोला ढोलक बाजैगावै किसनमा होरी!!
ऐलै फागुन के महीना हुलसै जिहरा-मोर!
गाँवऽ के छैला नंदे के लाला बनी गेलै रास-रचैया!
सबके धिया राधा बनी डोलै नाचै ता-ता-थैया!!
ऐलै फागुन के महीना हुलसै जिहरा-मोर!
