भारत की संस्कृति के लिए... भाषा की उन्नति के लिए... साहित्य के प्रसार के लिए
किसान / अशोक शुभदर्शी
Kavita Kosh से
किसानोॅ के गैता के
निरंतर प्रहारोॅ सें
टूटलोॅ छेलै चट्टान
धूर-धुसरित होलोॅ छेलै चट्टान
आरो बनैलोॅ गेलोॅ छेलै
समतल खेत
नहर लानलोॅ गेलै
पहाड़ोॅ में सुरंग बनाय केॅ
खेतोॅ तांय
भगीरथ पसीना के प्रतिफल छेकै
ई गन्ना, ई केतारी
कोय नै चुकाबेॅ पारतै
ई केतारी केरोॅ कीमत
घाम-पसीना के बूंदोॅ रोॅ कीमत
जे कर्जदार भी छै
बेशरम गरम हवा केरोॅ बीच
महाजनोॅ केरोॅ
नै जानै छै कोय
केना केॅ
किसान मरी जाय छै
केतारी उपजैला सें कम
महाजन के तकादा सें जादा
ऊ शहीद होय जाय छै।
