भारत की संस्कृति के लिए... भाषा की उन्नति के लिए... साहित्य के प्रसार के लिए
तोहरऽ बिना / खुशीलाल मंजर
Kavita Kosh से
देखऽ
है वहेॅ जग्घऽ छेकै
जेकरा हम्में
कहियो भूलेॅ नै पारै छी
भूलेॅ नै पारै छी
हौ बेसाखऽ रऽ ठहाका ई जोयिा
आरेा हौ ई जोरिया में
पछिया हवा रऽ गुदगुदी सें भरलऽ मजाक
तोरा केनांकेॅ बिस्वास दिलैय्यों
कि आय सब फीका लगै छैं
फीका लागै छै
जिनगी केॅ एक लहास समझी केॅ ढोना
अफसोस कि तोहें साथें नैं छऽ
होना केॅ तोहरऽ साथ रहना
हारऽ जिनगी केॅ
पहिलऽ आरो आखिरी अरमान छेलै
तोहरा सायद याद नै होतौं
कि हौ आमऽ के गाछ
जहां तोहें आपनऽ सखी रऽ साथ
अट्ठा गोटी खेलै छेली
आय कत्तेॅ उदास लागै छै
लागै छै
तोरा गेला के बाद
यहां से सबकुछ बिदा होय गेलै
बची गेलऽ छै खाली
तोरऽ याद
आरो यादऽ के बीहड़ वनऽ में
हमरऽ जिनगी के
भटकलऽ होलऽ कहानी
