भारत की संस्कृति के लिए... भाषा की उन्नति के लिए... साहित्य के प्रसार के लिए
दहेज / संजीव कुमार 'मुकेश'
Kavita Kosh से
सुरसा जइसन मुँह बइलें हें,
गेलें एजा नञ् आबे के.
हमरा अप्पन बेटा के अब!
नञ् हे बैल बनाबे के.
स्वार्थ, हाय, लालच के फेर में,
केतना घरे उजाड़ देलें।
सुघड़, सुषील, मुनरी बेटी के,
जहर-जला के मार देलें।
सोफा, फिरीज के की करबय,
संस्कार से घर हे सजाबे के.
हमरा अप्पन बेटा के अब!
नञ् हे बैल बनाबे के.
गर कमाय से नञ् होतइ तऽ,
खैरात लुटे से कि होतइ.
पढ़ल, लिखल, समटल बेटा के,
गला में पट्टी बंध जइयइ.
सौभाग्य लक्ष्मी घर लावे के हे,
बाद में नञ् पछताबे के.
हमरा अप्पन बेटा के अब!
नञ् हे बैल बनाबे के.
तोहरे चक्कर में मुनीया बेटी,
बाप के बनल बोझ हकई.
16 में 15 आना के बाप,
नञ् अखने सोझ हकई.
पइसा नञ् हे असली धन,
इ बात! अमल में लावे के.
हमरा अप्पन बेटा के अब!
नञ् हे बैल बनाबे के.
