भारत की संस्कृति के लिए... भाषा की उन्नति के लिए... साहित्य के प्रसार के लिए
फरक / शिवराज भारतीय
Kavita Kosh से
देखणै में तो
घणो फरक दीसै
ना हाथी दीसै
ना घोड़ा
ना रथ दीसै
ना पालकी
ना सिंहासण दीसै
ना ढूळीजता चंवर
कदै-कदै लागै
जाणै स्यात्
राजशाही कदैई गई
अबै तो लोकतंतर इज है
राज रा पायक
गांव री गळियां में
दीसै तो है ई
भलैई पांच-च्यार सालां में
एक बार ई
वांरै पाखती
कांई बी नीं
हाथी-घोड़ा पालकी
सिंहासण अनै चंवरां सूं
साव अळगा
धोळा धप्प गा‘भां पैरया
उंपाळा ई चालता दीसै
पण पांच सालां तांई
वांरो अदीठ रैवणो
वांरै आखती-पाखती
हाथ जोड्यां
मोटै हुजूम रो गिरगिरावणो
अर वां रा जै‘कारा
मोटै मंचा ऊबा होय‘र
आथ सूं
जाणैं आसीरवाद देंवता
अर ऊंडा मुळकता
जद वै लखावै
तो लागै जाणैं
राजशाही
चोळा बदळदयो है
लोकतंतर
हाल घणो अळगो है।
