भारत की संस्कृति के लिए... भाषा की उन्नति के लिए... साहित्य के प्रसार के लिए
समाधि / मनोज शांडिल्य
Kavita Kosh से
एहि एकपेड़िआ पर
बढ़ल जा रहल अछि ओ
नितांत एकसरे
आगाँ बला सभ
निकलि गेल छैक
बहुत आगू
दृष्टिक सामर्थ्य सँ बहुत दूर
आ ओकर पाछू –
किओ नहि
अपन प्रजातिक पाँति मे
प्रायः
ओकर स्थान छैक अंतिम
कुकुर-कटाउझ करैत
कतेको पुरना सहयात्री
ध’ लेने छैक
दोसरे कोनो बाट
नः
ओ सभ नहि रहलैक आब
ओकर प्रजातिक
एहि एकपेड़िआ पर
एकसरे चलैत
भ’ रहल छैक ओकरा
समाधिक अनुभूति
एतय
बोधि-वृक्ष कतहु नहि
मुदा तैयो
मुक्त अकासक छाँह मे
भ’ रहल अछि ओ शुद्ध
बनि रहल अछि ओ बुद्ध
