समुंड / इंदिरा वासवाणी
समुंडु
हाणे माठि हो
धरतीअ ते शान्त सुम्हियलु
अखियूं अटिकाए आसमान में
हिकु नंढिड़ो ॿारु
ओचितो उथी निहारण लॻो
समुंड खे!
न ॼाणु जं़हिं जूं छोलियूं
किथे उमाणे आयूं सन्दसि प्यार खे!
यक टिक निहारीन्दो पाण ॾांहुं
छिरिकी वियो समुंडु।
जंहिं अनेक सुवाल पढ़िया पिए
उन अबहम जे निमाणनि नेणनि में
अखियुनि सां अखियूं मिलाइण जी
सघ कोन हुई खेसि
पर मासूम जे शान्तीअ
अशान्त करे छॾियो
समुंड खे!
मन सन्दसि में हुई लोछि पोछि
जवाबनि ॾियण जी
ऐं सुरी आयो समुंडु उन निर्दोष ॾांहुं
पंहिंजो पाण खे गुनहगारु समुझी
ॿारिड़ो चुप हो
समुंड ॻाल्हाइणु शुरू कयो
‘मौन हुउसि मां सालनि जा साल
मर्यादा पंहिंजीअ खे टोड़ियो
कोन हो मूं कॾहिं
हीउ लहरूं
छातीअ मुंहिंजीअ तां लुडंदियूं
ठाहे लूणाटियल बेटारियूं
बणियूं जीआपो
अणॻणित ज़िंदगियुनि जूं
रात जे पहर हाकारीन्दा ॿेड़ियूं
मुहाणा, झूंगारीन्दा हवा सां
सुर में सुरु मिलाए
भरे वेन्दा हुआ पंहिंजो गुज़रानु
पेटां मुंहिंजे ॻोल्हे
ॾेहनि परॾेहनि खां,
आमदनी रवानगीअ जो वाहणनि ज़रीए
आबाद थियो ज़मीन ते
अॾियलु हिकु
महा आस्थानु!
मां त हुअसि वसीलो उन्हनि जो,
जीअण वास्ते
जिनि अची वसाया वण हिन धरतीअ जा!
मन जी गहराई मुंहिंजी पंहिंजी हुई
कल जंहिंजी
कंहिं ॿिये खे कान पेई
पर न्याअ अन्याअ जा धक जेके मूं सठा
तिनि पैदा करे छडियो विलोड़
मुंहिंजे मन में
ही ग़लत सही कृतियूं
सठियूं मूं खां वेयूं नथे
उपति खपति जा मामला
मूं खां ॾिठा विया नथे
रंजु, मन मुंहिंजे में गडु थीन्दो रहियो।
बेॾोही ॿालक जूं अखियूं
अञा वि ॼमियल हुयूं
समुंड ते!
ज़बान ॼणु त खांउसि वरिती हुई खसे
समुंड, वरी ॿोलणु कयो शुरू
ग़लत खे सही करण लाइ
मूंखे करिणो हुओ कुझु ज़रूर
मन मुंहिंजे में पैदा थियो
रूपु काली माता जो!
माता काली, घुरन्दी आ ॿली
मुंहिंजो क्रोधु वियो वधन्दो
उन में तूफ़ानी हवा
ओड़क बरसात
वीर चोॾसि जी बि ॾिनो साथु।
हू बि कावड़ियल हुआ,
कंहिं अरसे खां
भला केसताईं केरु
सही सघन्दो आ अन्याअ खे?
ऐं मां उथिली पियसि
टुटी पियो बन्दु मुंहिंजो
तूफ़ानी हवा थी पेई बेक़ाबू
धूकीन्दी मां अॻिते वधियसि
वीर चोॾसि जे
बणायो पाॻल लहरुनि खे
मथां ओड़क बरसात
चौधारी विनाश...विनाश!!!
धिकिजी विया अलाए वाहण केॾांहुं
लुढ़ी वेयूं ॿेटारियूं लूण जूं
थी वेयूं जीवन निरजीवन
जूं ग़ाइब दिशाऊं
न्याय अन्याय जो
ही हो कहिड़ो चक्करु?
हाणि त मुंहिंजो
ख़ुद मूं ते ई वसु न रहियो,
कुदरत जो मिक़दारु लॻो घटिजण
ख़बर नाहे केतिरियूं लहरूं हुयूं
केतिरियूं ज़िंदगियूं हुयूं
मुंहिंजे अशान्तीअ करे छॾियो
सभिनी खे शान्त!
उन खे ॿियो कहिड़ो नालो ॾिजे?
हिक इनसानी स्थिती
हुई सभिनी लाइ साॻी
जंहिं कंहिं में को
फ़र्कु नथे रखियो
न धर्म में, न ईमान में
न रंग में, न रूप में
न जीव में, न निरजीव में
मनु मुंहिंजो वियो धोपिजी
मां थी वियसि माठि।
इहो बुधी
ॿालो भोलो ॿालकु
लॻो रुअण
सुॾिका भरीन्दे समुंड खे लॻो घूरण
घूरीन्दो रहियो
समुंडु बि दुखी थी वियो।
”पार ॿचा, इन में रुॻो
मुंहिंजो ई त ॾोहु कोन्हे
सदियुनि खां जंहिं पवित्रता खे
आो आहियां मां महसूसीन्दो
उन में ख़ललु पवन्दे ॾिसणु
वस मुंहिंजे खां हो ॿाहिर।“
समुंडु थी वियो चुप
शायद ॿार खे पंहिंजीअ घूर जो
मिली वियो जवाबु
पर आवाजु सन्दसि
पोइ बि मोटी कोन आयो
हू अञा बि शान्त हुओ!
(नोट: हिन में सुम्हियल ॿार जो फोओ ‘टाईम’ मख़ज़न में ॾिनलु हो। कच्छ ते हीउ क़हरु 9 जून, 1998 ते सुबूह जो 8-15 खां शाम जो 4 बजे ताईं हो)
