भारत की संस्कृति के लिए... भाषा की उन्नति के लिए... साहित्य के प्रसार के लिए
ऊपरऽ से लागथौं ठिक्के / खुशीलाल मंजर
Kavita Kosh से
की पूछै छऽ देसऽ रऽ हाल
कहबौं तेॅ करभा आंख लाल
रोज संसद में होय छै सोर
व्यभिचार पर करऽ कंट्रोल
लेकिन की हौतैं देवऽ रऽ कपाड़
जे छै जोगबारऽ वहेॅ छै चोर
केनांक सुधरतौं तोहरऽ चाल
की पूछै छऽ देसऽ रऽ हाल
रोज रोज के यहेॅ हल्ला
जनवादी से पड़लऽ छौं पल्ला
करै के कुच्छ तेॅ करतौं की
कंबल औढ़ी केॅ पीयै छऽ घी
केकरऽ कहै छऽ करै लेॅ बात
की पूछै छऽ देसऽ रऽ हाल
ऊपरऽ सें देखऽ तेॅ लागथौं ठिक्के
बातों करतौं मीट्ठे-मीट्ठे
डुबकी मारी केॅ पीतौं पानी
बुझै में नै ऐतौं, है पिहानी
की करै छऽ भूतपकड़ा रऽ बात
कामऽ बकती मारतौं लात
की पूछै छऽ देसऽ रऽ हाल
गरजऽ बक्तीं गोड़ो पकड़तौ
गरज मिटतौं तेॅ हापकै लेॅ दौड़तौं
घरऽ घरऽ में झगड़ा लगाय केॅ
आपनऽ मढ़री खूब झाड़तौं
देखऽ नी ऐलऽ छौ लच्चा के राज
की पूछै छऽ देसऽ रऽ हाल
