भारत की संस्कृति के लिए... भाषा की उन्नति के लिए... साहित्य के प्रसार के लिए
ओरचन / केशव मोहन पाण्डेय
Kavita Kosh से
दुआरी पर
किनारे
देवाल से सटा के
खड़ा कइल बा
एगो खटिया,
ओकर हालत
बड़ा डाँवाडोल बा
ओकरा बीचवा में
बड़ा झोल बा
केहू केऽ तरे सुतत होई
बुझाते नइखे
बाकिर
ओरचन कसाइल बा
ओरचन में
दस गो गाँठ बा
आ दोसरा ओर
अइसन बिछवना बा
जइसे राजा के ठाट बा।
सबके माई-बाप
इहे चाहेला
कि आपन जामल
दूध के कुल्ला करे
अमृत के धार पीये
भले माई-बाप
जिनगी भर लुगरिये सीये।
ओही दुआरी पर ना
अनगिनत दुआरी पर
खटिया खाड़ बा
ओह संतानन खातिर
माई-बाप के ढोवल
पहाड़ बा।
अनगिनत पूत
सँचहू दूध के कुल्ला करत
अमृत के धार पीअत बाड़े
आ माई-बाप
जिनगी के साँस गिनत
आसरा के खटिया के
नेह के ओरचन
मर्यादा के गाँठ
बान्ह-बान्ह कसता
अभागी संतान
सोचते नइखे
कि ओकरा पर
समय केतना हँसता।
